ਜੀ ਆਇਆਂ ਨੂੰ
You are here: Home >> Kavi ਕਵੀ >> ਬੋਲ ਵੇ ਮੁਖੋਂ ਬੋਲ/Bol Ve Mukhon Bol

ਬੋਲ ਵੇ ਮੁਖੋਂ ਬੋਲ/Bol Ve Mukhon Bol

ਕੋਈ ਬੋਲ ਵੇ ਮੁਖੋਂ ਬੋਲ
ਸੱਜਣਾ ਸਾਂਵਲਿਆ
ਸਾਡੇ ਸਾਹ ਵਿਚ ਚੇਤਰ ਘੋਲ
ਸੱਜਣਾ ਸਾਂਵਲਿਆ

ਜੇ ਸਾਡੇ ਸਾਹੀਂ ਚੇਤਰ ਘੋਲੇਂ
ਮੈਂ ਹਿਰਨੀ ਬਣ ਜਾਵਾਂ
ਰੂਪ ਤੇਰੇ ਦੇ ਸੰਘਣੇ ਬਾਗੀਂ
ਚੁਗਣ ਸੁਗੰਧੀਆਂ ਆਵਾਂ
ਤੂੰ ਮੈਨੂੰ ਮਾਰੇਂ ਬਾਣ ਬਿਰਹੋਂ ਦੇ
ਮੈਂ ਤੱਤੜੀ ਗਸ਼ ਖਾਵਾਂ
ਲੱਖ ਪਿਆਵੇ ਮੈਂ ਨਾ ਪੀਵਾਂ
ਬੋਲ ਸੁਗੰਧੀਉਂ ਸੋਹਲ
ਸੱਜਣਾ ਸਾਂਵਲਿਆ
ਸਾਡੇ ਸਾਹ ਵਿਚ ਚੇਤਰ ਘੋਲ
ਸੱਜਣਾ ਸਾਂਵਲਿਆ ।

ਜੇ ਸਾਡੇ ਸਾਹੀਂ ਚੇਤਰ ਘੋਲੇਂ
ਮੈਂ ਚਾਨਣ ਬਣ ਜਾਵਾਂ
ਅੱਧੀ ਰਾਤੀਂ ਵਣ ਚੰਨਣ ਦੇ
ਤੈਂਡੀ ਖ਼ਾਤਰ ਗਾਹਵਾਂ
ਮਹਿਕ ਕੁਆਰੀ ਪੈਰੋਂ ਭਾਰੀ
ਤੈਂਡੀ ਸੇਜ ਵਿਛਾਵਾਂ
ਸੁੱਤੇ ਪਏ ਦਾ ਚੁੰਮਣ ਲੈ ਕੇ
ਜਾਵਾਂ ਪਰਤ ਅਡੋਲ
ਸੱਜਣਾ ਸਾਂਵਲਿਆ
ਸਾਡੇ ਸਾਹ ਵਿਚ ਚੇਤਰ ਘੋਲ
ਸੱਜਣਾ ਸਾਂਵਲਿਆ ।

ਜੇ ਸਾਡੇ ਸਾਹੀਂ ਚੇਤਰ ਘੋਲੇਂ
ਮੈਂ ਬਦਲੀ ਬਣ ਜਾਵਾਂ
ਜਿਹੜੇ ਰਾਹੀਂ ਸਾਹ ਤੇਰਾ ਲੰਘੇ
ਉਸ ਰਾਹ ‘ਤੇ ਵਰ੍ਹ ਜਾਵਾਂ
ਵੇਦਨ ਦੇ ਖੂਹ ਉਮਰੋਂ ਗਹਿਰੇ
ਗਲ ਗਲ ਭਰਦੀ ਜਾਵਾਂ
ਜਿਹੜੇ ਖੂਹੀਂ ਲੱਜ ਨਾ ਹੁੰਦੀ
ਨਾ ਹੁੰਦੇ ਸੂ ਡੋਲ
ਸੱਜਣਾ ਸਾਂਵਲਿਆ
ਸਾਡੇ ਸਾਹ ਵਿਚ ਚੇਤਰ ਘੋਲ
ਸੱਜਣਾ ਸਾਂਵਲਿਆ ।

ਜੇ ਸਾਡੇ ਸਾਹੀਂ ਚੇਤਰ ਘੋਲੇਂ
ਮੈਂ ਤਿਤਲੀ ਬਣ ਜਾਵਾਂ
ਬੂਰ ਬਿਰਹੋਂ ਦਾ ਅਕਲੋਂ ਮਹਿੰਗਾ
ਦਰ ਦਰ ਵੰਡਣ ਜਾਵਾਂ
ਰੁੱਖ ਬਿਰਹੋਂ ਦਾ ਨਹੁੰਓਂ ਨਿੱਕਾ
ਅਰਬਾਂ ਕੋਹ ਪਰਛਾਵਾਂ
ਇਹ ਰੁੱਖ ਜਿਹਾ ਅਵੱਲੜਾ ਉਗਦਾ
ਐਨ ਕਲੇਜੇ ਕੋਲ
ਸੱਜਣਾ ਸਾਂਵਲਿਆ
ਸਾਡੇ ਸਾਹ ਵਿਚ ਚੇਤਰ ਘੋਲ
ਸੱਜਣਾ ਸਾਂਵਲਿਆ
ਕੋਈ ਬੋਲ ਵੇ ਮੁਖੋਂ ਬੋਲ
ਸੱਜਣਾ ਸਾਂਵਲਿਆ ।

About Rajinderapl Sandhu

Click on a tab to select how you'd like to leave your comment

Leave a Reply

Your email address will not be published. Required fields are marked *

*

Scroll To Top
Skip to toolbar