ਸੱਜਣ ਜੀ ਮੈਂ ਚੰਬੇ ਦੀ ਖ਼ੁਸ਼ਬੋ ਇਕ ਦੋ ਚੁੰਮਣ ਹੋਰ ਹੰਢਾ ਅਸਾਂ ਉੱਡ ਪੁੱਡ ਜਾਣਾ ਹੋ ਸੱਜਣ ਜੀ ਮੈਂ ਚੰਬੇ ਦੀ ਖ਼ੁਸ਼ਬੋ । ਧੀ ਬਗ਼ਾਨੀ ਮੈਂ ਪਰਦੇਸਣ ਟੁਰ ਤੈਂਡੇ ਦਰ ਆਈ ਸੈਆਂ ਕੋਹ ਮੇਰੇ ਪੈਰੀਂ ਪੈਂਡਾ ਭੁੱਖੀ ਤੇ ਤਿਰਹਾਈ ਟੁਰਦੇ ਟੁਰਦੇ ਸੱਜਣ ਜੀ ਸਾਨੂੰ ਗਿਆ ਕੁਵੇਲਾ ਹੋ ਸੱਜਣ ਜੀ ਮੈਂ ਚੰਬੇ ਦੀ ਖ਼ੁਸ਼ਬੋ । ਸੱਜਣ ਜੀ ਅਸਾਂ ਮੰਨਿਆਂ ਕਿ ਹਰ ਸਾਹ ਹੁੰਦਾ ਹੈ ਕੋਸਾ ਪਰ ਹਰ ਸਾਹ ਨਾ ਚੁੰਮਣ ਬਣਦਾ ਨਾ ਹਰ ਚੁੰਮਣ ਹਉਕਾ ਨਾ ਹਰ ਤੂਤ ਦਾ ਪੱਤਰ ਬਣਦਾ ਰੇਸ਼ਮ ਦੀ ਤੰਦ ਹੋ । ਸੱਜਣ ਜੀ ਮੈਂ ਚੰਬੇ ਦੀ ਖ਼ੁਸ਼ਬੋ । ਸੱਜਣ ਜੀ ਅਸੀਂ ਚੁੰਮਣ ਦੇ ਗਲ ਕਿਤ ਬਿਧ ਬਾਹੀਂ ਪਾਈਏ ਜੇ ਪਾਈਏ ਤਾਂ ਫਜ਼ਰੋਂ ਪਹਿਲਾਂ ਦੋਵੇਂ ਹੀ ਮਰ ਜਾਈਏ ਸਮਝ ਨਾ ਆਵੇ ਚੁੰਮਣ ਮਹਿੰਗਾ ਜਾਂ ਜਿੰਦ ਮਹਿੰਗੀ ਹੋ । ਸੱਜਣ ਜੀ ਮੈਂ ਚੰਬੇ ਦੀ ਖ਼ੁਸ਼ਬੋ ਇਕ ਦੋ ਚੁੰਮਣ ਹੋਰ ਹੰਢਾ ਅਸੀਂ ਉੱਡ ਪੁੱਡ ਜਾਣਾ ਹੋ ।